राम जिनगी के सार
//लेख//
//राम – जिनगी के सार//
मनखे के जिनगी म भगवान के नाम कतका अनमोल हे; येला आप मन जानत हव। मनखे जनम से लेकर देह के नश्वर होत ले नाम जपथे, अउ अंत म भगवान के शरण म ही जा के मुक्ति पाथे। भगवान के बिना जिनगी बिरथा हे, काबर कि कहे जाथे कि भगवान के मर्जी बिना एक पत्ता नइ हालय, तब तो फेर हमर जिनगी के बात आय। अइसे तो पूरा तैंतीस कोटि देवी–देवता म अलग-अलग मनखे ह अलग- अलग भगवान ले जुड़े रहीथें। हमर हिंदू धर्म म मर्यादा पुरुषोत्तम, भगवान श्री रामचंद्र जी ल कहे जाथे।
संगवारी हो..... हमर जिनगी म "राम" शब्द के अब्बड़ महत्व हे, अउ राम कहे के घलो अलग-अलग अर्थ निकलथे।
त आवव जाने के प्रयास करथन....।
बिहनिया उठते साथ मनखे मन सब ले पहिली भगवान ल सुमिरथें तेकर पाछू आने काम ल करथें अउ घर ले बाहिर जाथें। पहिली कोनो मनखे संग भेंट होथे त एक हाथ ल माथ म छुवात कहिथें– "राम–राम" कका....., दुसर डहर ले बड़ जोश म आवाज आथे "राम–राम ग, राम–राम!" एखर मतलब राम–राम के जोहार करना। आज कल के युवा पीढ़ी एक-दुसर ले मिलथें त दुनों हाथ जोड़त बड़ उत्साह के संग कहिथें– "जय जय श्री राम!" ये सुन के मन गदगद हो जाथे।
मनखे नहा–खोर के अगरबत्ती, दीया जलाके, कोनो ह माला धर के 108 बार या 11बार अपन इच्छानुसार, समय अनुसार मनका फेरत अपन आत्मा ल भगवान ले जोड़त धीरे–धीरे कहिथे– "राम राम राम राम"। एखर मतलब हरै राम नाम के भक्ति करना।
दिनचर्या चलत रहिथे, अगर कोनो लइका अब्बड़ जिद्दी हे, बात ल नइ मानै; त दाई–ददा मन खिसियात थोरिक लमा के जोरदरहा आवाज म कहिथे– "राम.... राम... राम....! का हो ही ये लइका के? समझ नइ आवै।" मतलब गुस्सा के संग म संसो करना।
हर मनखे के जिनगी म विपत्ति तो आबे करथे, कभू घाम ता कभू छॅंइहा। जब कोनो विपत्ति के हल मिलबे नइ करै ता मनखे भगवान ऊपर सउॅंपत हृदय के भितरी ले कहिथे– "हे राम!..... अब सब तोर हाथ म हे।"
कोनो कारज ल करे के उदीम करत हें अउ ओखर परिणाम ल मनखे नइ जानय त बोलथें– "सब राम भरोसा हे। राम जाने का करही।" ये एक ही शब्द- 'राम भरोसा' म ही आधा संसो दूरिहा जाथे।
मनखे ह आश्चर्य जनक खबर सुनथे त अचानक मुँह ले आवाज निकलथे– "हे राम! अरे राम! ये का होगे।" तब समझ आथे कि कोनो आश्चर्य जनक, अविश्वसनीय घटना सुन ले हे।
कोनो मनखे या लइका लोग ल कतको समझा लै, मानबेच नइ करे त सामने वाला मनखे ऊब जाथे अउ बोलथे- "अब कुछ कर बाबू मैं नइ जानो, तैं जान तोर काम जाने, जय राम जी की! अब तैं मोर बात ल नइ मानत हस मैं तोला अब "राम" नइ बोलॅंव।" बोले के बाद शांत हो जाथे अउ ओकर रद्दा ले घुच जाथे।
धीरे-धीरे मनखे उम्र के पड़ाव पार करत अइसे सोच म पड़ जाथे कि अब 'राम के अलावा ये दुनिया म कोनो नइ हे।' सांस के रफ्तार धीरे-धीरे अइसे कमती होथे जइसे लाइन बंद होथे त पंखा ह रुकथे। मुँह ह सूखत जाथे अउ जब आवाज निकलना मुश्किल हो जाथे तब सिर्फ होंठ हिलथे – "र....रा.....म....!" त लोगन ल समझ आ जाथे कि अंतिम साँस लेवत हे। अब राम भगवान के शरण म जाए के, पृथ्वी लोक ल छोड़े के पारी आ गे हे।
मोह माया के भँवर म हर मनखे ह अमरबेल कस अरझे रहीथे। कोनो अगरबत्ती जला के दिन रात "राम राम" के सुमिरन करथे त कोनो अंतस ले कलेचुप।
हाय पैसा, मोर घर, मोर मनखे सब मोर....मोर.... मोर.......बाकी कोनो नहीं!
जेन करत हँव, मैं करत हँव, मोर सिवा कोनो नइहे। ये सब झूठ हरै। 'मैं सही हॅंव' के मेकरा जाला म फँस के आदमी भुला जाथे कि ये संसार म 'राम नाम के अलावा कुछु सत्य नइ हे।' तभे तो...जब कोनो मनखे के जीव उड़ा जाथे न त मुक्ति धाम तक लेगत ले रद्दा भर लोग मन ये सुरता करावत नइ जाय कि तैं का-का करे हस, तोर बैंक बेलेंस कतेक छोड़े हस; सब के मुँह ले सिर्फ एक ही वाक्य बोले जाथे– "राम नाम सत्य हे।"
संगवारी हो......ये "राम नाम" ही दुनिया के सार हरै। मैं राम भगवान के महिमा के हंसी-मजाक करे बर या ठेंस पहुँचाए बर नइ लिखे हँव। जो सही हे, आज के दुनिया म वही बात लिखाय हे। "राम नाम" म ही कतका आनंद हे येला आप मन जानत हव। एक राम शब्द के अलग-अलग अर्थ अउ महत्व हे, मोर नादान मति ले येला आप मन तक पहुँचाए के नानकुन प्रयास करे हँव। कोनो गलती होही त जरूर बताहु।
अंत म मैं बस अतका बोलना चाहहूँ कि–
"राम नाम कलि कामतरु, सकल सुमंगल कंद।
सुमिरत सब सुख पाइए, मन मानही आनंद।।"
"जय जय श्री राम"
रचनाकार
प्रिया देवांगन "प्रियू"
राजिम
PRIYA DEWANGAN "PRIYU"
Comments
Post a Comment